ફરી એક વખત દિલ્લીની શાળાઓમાં બોમ્બથી ઉડાવી દેવાની ધમકી મળતા લોકોમાં ભયનો માહોલ જોવા મળ્યો છે. સોમવારે સવારે રાજધાની દિલ્હીમાં ભયનો માહોલ ફેલાયો જ્યારે શહેરના વિવિધ વિસ્તારોમાં નવ અગ્રણી શાળાઓને બોમ્બ ધમકીઓ મળી. આ ધમકીભર્યા કોલ સવારે 8:30 થી 9:00 વાગ્યાની વચ્ચે આવ્યા, જેના કારણે શાળા વહીવટીતંત્ર અને સુરક્ષા એજન્સીઓને તાત્કાલિક એલર્ટ પર જવા માટે કહેવામાં આવ્યું.
માહિતી મળતાં, શાળાઓએ તાત્કાલિક દિલ્હી પોલીસને જાણ કરી. પોલીસ, ફાયર બ્રિગેડ અને બોમ્બ સ્ક્વોડ ટીમો ઘટનાસ્થળે પહોંચી અને શાળા પરિસરની સઘન તપાસ હાથ ધરી હતી. ધમકીને ગંભીરતાથી લેતા, ઘણી શાળાઓના વિદ્યાર્થીઓને વર્ગખંડોમાંથી બહાર કાઢીને સલામત સ્થળોએ લઈ જવામાં આવ્યા. કેટલીક શાળાઓએ રજા જાહેર કરી, જ્યારે વાલીઓને પણ તાત્કાલિક જાણ કરવામાં આવી હતી.