१९-फरवरी-२०२६ दिनाङ्के नवदेहल्याः भारत-मण्डपे प्रधानमन्त्रिणा नरेन्द्र-मोदिना 'इण्डिया एआई इम्पैक्ट समिट-२०२६' (India AI Impact Summit) इत्यस्य उद्घाटनं कृतम्, यस्य मुख्य-विषयः 'सर्वजन-हिताय, सर्वजन-सुखाय' अस्ति। अस्मिन् सम्मेलने उपस्थितः फ्रान्स-देशस्य राष्ट्रपतिः इमैनुएल-मैक्रो प्रधानमन्त्रिणे एकं महत्त्वपूर्णम् आग्रहं कृतवान् यत् भारतमपि अप्राप्त-पञ्चदश-वर्षाणां बालानां कृते सामाजिक-माध्यमेषु (Social Media) प्रतिबन्धं कुर्यात्। तेन उक्तं यत् फ्रान्सदेशे अस्य प्रतिबन्धस्य प्रक्रिया आरब्धा अस्ति तथा च ग्रीस-स्पेन-सदृशाः देशाः अपि अस्मिन् विषये चिन्तयन्त: सन्ति, यदा तु अस्ट्रेलिया-देशेन पूर्वम् एव एतादृशः निर्णयः घोषितः अस्ति। मैक्रोमहोदयेन भारतस्य डिजिटल-प्रगतेः भूरि-भूरि प्रशंसा कृता, विशेषतः १.४ बिलियन-जनानां डिजिटल-परिचयस्य तथा प्रतिमासं विंशति-बिलियन-डिजिटल-व्यवहाराणां (Transactions) सफलतायाः उल्लेखः कृतः। तस्य विश्वासः अस्ति यत् बालानां रक्षणाय अस्मिन् क्रान्तिकारिपदक्षेपे भारतं निश्चितरूपेण सहयोगं करिष्यति, यतः एतत् केवलं नियमस्य न, अपितु सभ्यतायाः रक्षणस्य विषयः अस्ति। अस्मिन् वैश्विके सम्मेलने संयुक्तराष्ट्रस्य महासचिवः एन्टोनियो-गुटेरेसः, विंशत्याधिक-देशानां राष्ट्राध्यक्षाः, पञ्चशताधिकाः AI-नेतृगणाः च भागं गृहीतवन्तः।