म्यान्मारदेशस्य राष्ट्रपतिः यू मिन् आङ् ह्लाइङ् पञ्चदिवसीययात्रायाः अङ्गत्वेन भारतम् आगतवान्। नवदेहल्यां भारतस्य विदेशमन्त्रिणा डॉ. एस. जयशङ्करेण सह तस्य द्विपक्षीयं मेलनम् अभवत्। अस्मिन् संवादद्वये उभौ देशौ परस्परसम्बन्धान् दृढीकर्तुं बलं दत्तवन्तौ। विदेशमन्त्रिणा सामाजिकमाध्यमेन प्रोक्तं यत्— "अहं म्यान्मार-राष्ट्रपतिना सह दीर्घकालीन-सहयोगं प्रगाढं कर्तुं तस्य सकारात्मक-भावनायाः प्रशंसां करोमि।" देहल्याम् आगमनात् पूर्वं म्यान्मार-राष्ट्रपतिः बिहार-राज्यस्य गया-क्षेत्रे प्रसिद्धे 'महाबोधिमन्दिरे' दर्शनं पूजां च कृतवान्। ततः परं देहली-विमानपत्तने केंद्रीय-विदेश-राज्यमन्त्रिणा कीर्तिवर्धनसिंहेण तस्य स्वागतं विहितम्। इदानीं प्रधानमन्त्रिणा नरेन्द्रमोदिना सह तस्य मेलनस्य प्रतीक्षा वर्तते।