प्रधानमन्त्री नरेन्द्रमोदी इजरायलदेशस्य यात्रायां वर्तते, यत्र विमानपत्तने प्रधानमन्त्रिणा बेन्जामिन्-नेतान्याहु-महोदयेन तस्य भव्य-स्वागतं विहितम्। इजरायल-संसदि (Knesset) सम्बोधयन् मोदिना 'हमास' सङ्घटनस्य नामोल्लेखं कृत्वा अक्तूबर-सप्तम-दिनाङ्कस्य नरसंहारस्य तीव्रा भर्त्सना कृता। तेन स्पष्टीकृतं यत् आतङ्कवादं प्रति भारतस्य 'सर्वथा-असहिष्णुता-नीतिः' (Zero Tolerance) वर्तते, अत्र द्वैध-नीतिः न सोढव्या। भारतम् 'अब्राहम-सन्धेः' पूर्ण-समर्थकम् अस्ति तथा च भारते यहूदीसमुदायः सर्वथा निर्भयः सन् निवसति इति तेन निगदितम्। "समग्रं विश्वम् अस्माकं परिवारः" इति घोषयन् तेन भारतस्य श्रेष्ठ-आर्थिक-प्रगतेः, वैश्विक-कृतकप्रज्ञा-सम्मेलनस्य (AI Summit) च उल्लेखः कृतः। द्विपक्षीय-सामरिक-सम्बन्धान् प्रगाढान् कर्तुं तस्य विशिष्टयोगदानाय संसदा तस्मै स्वकीयः सर्वोच्चः पुरस्कारः 'स्पीकर-ऑफ-द-नेसेट्-पदकम्' (Speaker of the Knesset Medal) प्रदत्तः।