सङ्गमनगर्यां प्रयागराजे 'मौनी-अमावस्या' महापर्वणि एकः महाविवादः उत्पन्नः जातः। यत्र एकतः कोटिशः श्रद्धालवः त्रिवेण्यां स्नानं कुर्वन्ति स्म, तत्रैव अपरतः ज्योतिष्पीठस्य शङ्कराचार्येण स्वामि-अविमुक्तेश्वरानन्देन स्नानस्य बहिष्कारं कृत्वा एकः गम्भीरः विवादः सृष्टः। अस्मिन् प्रकरणे प्रशासनस्य तथा च शङ्कराचार्यस्य मध्ये तीव्रः आरोप-प्रत्यारोपः अभवत्। शङ्कराचार्येण मीडिया-माध्यमेन प्रशासनोपरि अत्यन्तं गम्भीरः आरोपः कृतः। तेन उक्तं यत्, "मम नेत्रयोः समक्षमेव पुलिस-अधिकारिभिः मम शिष्याः ताडिताः, तेषां वक्षस्थले प्रहृत्य ते पातिताः। यदा वयं प्रत्यावर्तनं कुर्वन्तः आस्म, तदापि पुलिस-बलेन ताडनम् अनुवर्तितम्।" शङ्कराचार्येण अस्य घटनाक्रमस्य पृष्ठतः राजनैतिकं कारणं दर्शितम्। तेन साक्षात् आरोपः स्थापित: यत् इदं सर्वं प्रदेशस्य मुख्यमन्त्रिणः योगी-आदित्यनाथस्य आदेशेन 'प्रतिशोध-भावनया' कृतम् अस्ति, यतः कुम्भमेलायाः अव्यवस्था-विषये तेन मुख्यमन्त्री उत्तरदायी घोषितः आसीत्। अपरपक्षे, प्रयागराज-प्रशासनस्य (डिविजनल-कमिश्नर-सौम्या-अग्रवाल-महोदयायाः) कथनम् अस्ति यत् शङ्कराचार्यः अनुमतिं विना अग्रे गच्छन् आसीत्, तथा च तेन पुलिस-अवरोधकानि (Barricades) दूरीकृतानि आसन्। प्रशासनेन स्पष्टीकृतं यत् सङ्गमे लक्षाधिक-जनानां सम्मर्द: आसीत्, अतः कस्यापि अप्रिय-घटनायाः निवारणाय तस्मै सामान्य-श्रद्धालुवत् स्नानाय आग्रहः कृतः आसीत्। किन्तु तेन न स्वीकृतं, प्रत्युत त्रि-होरा-पर्यन्तं मार्गं अवरुध्य अव्यवस्था प्रसारिता।