पश्चिमबङ्गालराज्ये प्रचण्डविजयानन्तरं प्रधानमन्त्रिण: अध्यक्षतायां प्रवृत्ते केन्द्रीयमन्त्रिमण्डलस्य प्रथममेलने एकः ऐतिहासिकः निर्णयः गृहीतः। अधुना राष्ट्रगीतं 'वन्दे मातरम्' राष्ट्रगानं 'जन-गण-मन' इव समानं मानं गौरवं च प्राप्स्यति। एतत् अस्माकं देशस्य एकतायाः सार्वभौमत्वस्य च प्रतीकं भविष्यति।

मन्त्रिमण्डलेन 'राष्ट्रिय-गौरव-अपमान-निवारण-अधिनियमे' (Prevention of Insults to National Honour Act) संशोधनस्य प्रस्तावः स्वीकृतः। अनेन संशोधनेन बङ्किमचन्द्रचट्टोपाध्यायद्वारा रचितस्य 'वन्दे मातरम्' गीतस्य अपमानं 'सञ्ज्ञेय-अपराधः' (Cognizable Offence) भविष्यति। 'सञ्ज्ञेय' इत्युक्ते आरक्षकाः (Police) अनुमतिं विना अपि अपराधिनं निरोद्धुं शक्नुवन्ति। वर्तमाननियमानुसारेण राष्ट्रगानस्य अपमानं कुर्वतः जनस्य कृते वर्षत्रयं यावत् कारावासः, दण्डः अथवा उभौ भवितुं अर्हतः। अधुना एषः एव दण्डः 'वन्दे मातरम्' अपमानस्य विषये अपि प्रयोक्ष्यते। उल्लेखनीयं यत् देशः इदानीं अस्य गीतस्य १५०-तमं जयन्ती-वर्षम् आचरति।
* AI Generated Image